Quem lembra o grande sucesso de Walter Veltroni?
A utilizaçom dum sistema de primárias abertas por parte do Partido Socialista francês para escolher o seu candidato à presidência da República Francesa colocou na agenda política do Estado Espanhol este método de selecçom. Equo permitiu aos seus simpatizantes participar na votaçom para configurar as suas candidaturas nas recentes eleiçons ao Congresso. Também pretende aplicar o sistema para eleger o seu candidato à presidência do governo andaluz. No PSOE o relatório aprovado pola executiva para o próximo congresso defende um sistema de primárias aberto ao conjunto da cidadania para seleccionar a/o sua/eu próxima/o candidata/o à chefatura do governo.
Também no nacionalismo galego há vozes que defendem este modelo para a escolha do próximo candidato do BNG à presidência do governo galego. Argumentam que democratiza as organizaçons partidárias e facilita a sua abertura à sociedade. Acrescentam que este método permitiria seleccionar candidatas e candidatos com um perfil mais adequado ao que demanda a sociedade e em consequência com mais possibilidades de competir eleitoralmente.
Segundo os defensores desse sistema a experiência das recentes primárias abertas no PS francês viria demostrar estas afirmaçons. Sem embargo, o sistema de primárias abertas -baixo diversas fórmulas- nom nasceu no PS francês senom que tem umha dilatada história que mais vem-se evidencia o contrário:
1. As primárias abertas estám na maior parte dos casos associados a organizaçons políticas verticais e em muitos casos também a sistemas políticos de escassa qualidade democrática por dizê-lo suavamente.
2. A utilizaçom deste mecanismo para a selecçom de candidatos/as nom garante o sucesso eleitoral.
Todas e todos conhecemos o caso dos Estados Unidos de América, exemplo clássico de primárias abertas que nom pode ser posto precisamente como modelo de organizaçons partidárias democráticas nem de democracia. No continente americano, talvez polo sistema presidencialista de muitos Estados, abondam os exemplos da utilizaçom de primárias abertas por distintas organizaçons para a eleiçom de candidatos ou candidatas. Desde a Concertación em Chile até a Consulta Popular do Partido Liberal de Colômbia, todo um modelo de democracia este último! Agora bem o caso mais chamativo seguramente seja o do PRI mexicano, outro exemplo de partido profundamente democrático, que em 1999 utilizou o sistema de primárias abertas para eleger a Labastida como candidato. A pesar do basto apoio recebido por Labastida nas primárias, seguramente proporcional à sua capacidade para financiar a campanha, o ano seguinte perderia as eleiçons presidenciais frente ao candidato do PAN. O PRI deixava o governo mexicano depois de mais de setenta anos!
Tambén em Europa temos exemplos anteriores ao PS francês de aplicaçom do sistema de primárias abertas. Um dos casos mais relevantes foi sem dúvida o do Partido Democrático italiano. No momento da sua fundaçom, em 2007, três milhons e médio de pessoas participárom -pagando para poder votar- na consulta convocada para eleger ao seu líder. Umha eleiçom que Walter Veltroni, na altura alcalde de Roma, ganhou com perto das três quartas partes dos votos. Um grande êxito de participaçom e de apoio a Veltroni que deixava franco o caminho para a vitória nas eleiçons do ano seguinte pensárom muitos, da mesma forma que agora o podemos ler referido ao PS francês. Grande equivocaçom no caso italiano, em 2008 o PD deixava o governo umha vez que a candidatura encabeçada por Veltroni só alcançou 33% dos votos. Berlusconi era o ganhador.
Nom, as primárias abertas nom conduzem a umha melhora dos resultados eleitorais e tampouco estám associadas a estruturas partidárias mais democráticas e abertas à sociedade. Ao contrário, em boa parte dos casos as primárias abertas correspondem-se com modelos partidários caudilhistas. Uns partidos nos que o líder já nom depende da militância nem lhe deve explicaçons a esta, nom é escolhido polas/os militantes mas polo conjunto da cidadania. Umhas estruturas partidárias que se constroem da cima para baixo. A associaçom entre primárias abertas e democracia nasce em boa parte dos casos dumha conceiçom restringida da democracia, umha visom da democracia que a limita à acçom de votar e que importa para o interior dos partidos os sesgos, por dizê-lo suavamente, que limitam a qualidade das democracias nas que vivemos.
Nom sabemos se finalmente François Hollande ganhará as próximas eleiçons mas o que si sabemos é que começa a defender posiçons distanciadas das do seu partido, o líder por riba do partido. Desliga-se do acordo assinado entre o PS e os écolos. Questiona o projecto de reforma fiscal do PS. Realiza declaraçons nas que avança a aceitaçom do incremento da idade de jubilaçom aprovada por Sarkozy, esquecendo assim o apoio do PS às posiçons sindicais. Como el mesmo afirma nom é um candidato do PS. Tampouco o era Veltroni, era um candidato aclamado nas primárias polo conjunto da cidadania italiana. Ganhador nas primárias abertas frente aos seus companheiros de partido e perdedor frente a Berlusconi, quem lembra hoje o grande sucesso de Walter Veltroni?
