Cinco preguntas e cinco respostas a respeito da política do novo goberno grego

De momento non se pechou o acordo co Eurogrupo, en parte porque aínda non sabemos cais son as ‘reformas’ que vai propor o goberno grego até hoxe (o 20 de febreiro de 2015) e cais serán admitidas.
Mais nós, eleitos en base ao programa do Syriza e quen consideramos que as propostas de Salónica constitúen un compromiso que adquirimos para co pobo grego, estamos profundamente preocupados, e é o noso deber informar disto.
O marco global do acordo é o seguinte:
1. A Grecia solicita a prórroga do acordo actualmente vixente en función dunha serie de compromisos;
2. A prórroga ten como obxectivo permitir que se finalice a avaliación do acordo actual co tempo suficiente para elaborar un eventual acordo novo;
3. A Grecia proporá sen demora unha listaxe de ‘reformas’ para seren avaliadas polas ‘institucións’, a partir das cais se chegará a un acordo no mes de abril. No caso dunha avaliación positiva, desbloquearanse os fundos que ficaron sen atribuír dentro do cadro do actual acordo, ao mesmo tempo que serán devolvidos os lucros do BCE;
4. Os fundos dispoñíbeis dentro do Fundo Europeo de Estabilidade Financeira (FEEF) serán destinados exclusivamente a cubriren as necesidades dos bancos e xa non se acharán baixo control grego;
5. A Grecia comprométese a cumprir plena e puntualmente todas as súas obrigas financeiras cos seus socios;
6. A Grecia comprométese a asegurar un superávit ‘axeitado’ co fin de garantir a sustentabilidade da débeda en conformidade coas resolucións do Eurogrupo do mes de novembro de 2012. O superávit para o 2015 terá en conta a situación económica do 2015;
7. A Grecia non revogará ningunha medida, nen realizará calquer mudanza unilateral que puider ter un efecto negativo sobre os obxectivos orzamentais, a recuperación económica ou a estabilidade financeira segundo a avaliación das ‘institucións’.
Sobre esta base, o Eurogrupo iniciará os procedementos nacionais con vistas a outorgar unha prórroga de catro meses do actual acordo e insta ás autoridades gregas para que iniciaren de inmediato o proceso de finalización da súa avaliación.
Resulta difícil entender como se pretende, a través deste acordo, levar a cabo as medidas anunciadas en Salónica, tais como a cancelación da maior parte da débeda e a substitución inmediata dos memorandos polo Plano de Reconstrución Nacional.
Aquelas persoas que fomos eleitas nas listaxes do Syriza comprometémonos a avanzar na realización do Plano de Reconstrución Nacional, independentemente das negociacións sobre a débeda, pois achamos preciso reactivar a economía e paliar o sufrimento da sociedade. Convén, pois, explicar agora como isto se vai levar a cabo e como o novo goberno pensa transformar a situación tráxica que herdou.
Máis especificamente, o Plano de Reconstrución Nacional contemplaba catro piares que suporían os seguintes custos no primeiro ano (en billóns de euros)*:
1. A loita contra a crise humanitaria (1,9 billóns);
2. O relanzamento da economía mediante desgravacións fiscais, a remodelación dos empréstimos abusivos, a creación dun banco de desenvolvemento, o restabelecemento do salario mínimo de 751 €/mes (total: 6,5 billóns);
3. Un plano de emprego público con 300.000 postos de traballo (3 billóns no primeiro ano e 2 billóns máis no segundo);
4. A transformación do sistema político mediante intervencións nos concellos e no Parlamento.
As fontes de financiamento previstas para o primeiro ano eran as seguintes:
1. A liquidación das débedas pendentes coa Axencia Tributaria (3 billóns)
2. A loita contra a fraude fiscal e o contrabando (3 billóns)
3. O Fundo Europeo de Estabilidade Financeira (3 billóns)
4. O Cadro Estratéxico Nacional de Referencia (CENR) e outros programas europeos (3 billóns)
,Á vista da comunicación do Eurogrupo, fago as seguintes preguntas:
O Plano de Reconstrución Nacional
Como se vai financiar o Plano de Reconstrución Nacional se os 3 billóns contemplados no Fundo Europeo de Estabilidade Financeira (FEEF) xa deixan de estar baixo control grego? A eliminación destes fundos tornará aínda máis premente a recadación de cantidades importantes grazas á loita contra a fraude fiscal e a liquidación das débedas pendentes coa Axencia Tributaria o máis rapidamente posíbel.
A cancelación da débeda
Como incidirá a cancelación da débeda se a Grecia se comprometer a cumprir plena e puntualmente todas as súas obrigas financeiras cos seus socios?
A fin da austeridade
Como pór fin á austeridade se a Grecia se comprometer a asegurar un superávit ‘axeitado’ co fin de garantir a sustentabilidade da enorme débeda actual? Segundo a Troika, a ‘sustentabilidade’ desta débeda foi xustamente o que orixinou a procura absurda dun superávit. Desde o momento en que non se reduce significativamente a débeda, deixarán de existir superávits primarios que resultan ser ruinosos para a economía grega e que son a esencia mesma da austeridade?
O control orzamental
Como proceder a calquer mudanza progresista no país se as ‘institucións’ exerceren un control estrito e prohiben calquer acción unilateral? As ‘institucións’ van permitir que se aplicaren os piares do Plano de Salónica ao implicaren un custo directo ou indirecto?
As futuras negociacións
O que é exactamente o que vai mudar nos catro meses da ‘prórroga’ para que as novas negociacións cos nosos socios se levaren a cabo a partir de mellores posicións? O que é que vai evitar a deterioración da situación política, económica e social do país?
Os tempos son verdadeiramente cruciais para a sociedade, a nación e, naturalmente, para a esquerda. A lexitimidade democrática do goberno radica no programa do Syriza. O mínimo que se pode facer é encetar un debate dentro dos órgaos do Partido e dentro do grupo parlamentar. Debemos oferecer respostas urxentes a todas estas preguntas para conservarmos os apoios e o impulso que nos brinda o pobo grego. As respostas que se deren no próximo período serán determinantes para o futuro do país e da sociedade.
[Nota do tradutor, Robert Neal Baxter]: *Billón = 100.000.00
(Publicado en grego no blog do autor http://costaslapavitsas.blogspot.co.uk/2015/02/blog-post_23.html cunha versión en francés no sitio Okea News http://www.okeanews.fr/20150224-k-lapavitsas-economiste-et-depute-syriza-pose-5-questions-au-gouvernement)
,-------------------------------------------------------------------------------------------------
Nota da Fundación Bautista Álvarez, editora do dixital Terra e Tempo: As valoracións e opinións contidas nos artigos das nosas colaboradoras e dos nosos colaboradores -cuxo traballo desinteresado sempre agradeceremos- son da súa persoal e intransferíbel responsabilidade. A Fundación e mais a Unión do Povo Galego maniféstanse libremente en por elas mesmas cando o consideran oportuno. Libremente, tamén, os colaboradores e colaboradoras de Terra e Tempo son, por tanto, portavoces de si proprios e de máis ninguén.