Compostela municipais 2011
O CIS acaba de publicar os microdados do estudo preleitoral realizado em Compostela entre Março e Abril de 2011. Trata-se de 500 inquéritos realizados mediante entrevistas pessoais nos fogares. Cumpre salientar que se trata dum inquérito preeleitoral, nalguns casos realizado dous meses antes da data das eleiçons, o que acentua o risco de que as respostas nom se correspondam com o comportamento final das eleitoras e dos eleitores. De facto lembremos que este estudo do CIS, considerando o voto declarado e a simpatia, dava lugar a umha clara infravoloraçom do voto ao PP na capital da Galiza. No caso do BNG o voto declarado mais a simpatia situava-o numha percentagem de voto (excluindo os NS/NC) muito próxima à que finalmente obtivo.
A percentagem das/os entrevistadas/os que afirmava que votaria ao BNG se as eleiçons se celebrassem o dia seguinte era de 7,6%, cifra que se eleva a 11,2% se excluimos aos que nom contestam, nom o sabem ou nom votariam.
Neste conjunto de eleitoras/es que declara ter decidido votar ao BNG chaman atençom duas cousas. Em primeiro lugar que a sua opiniom sobre a gestom municipal nos últimos quatros anos é pior que a do conjunto das/s entrevistadas/os. Para 21% a gestom foi má ou muito má e para 55% foi regular, apenas 21% a qualifica como boa.
Em segundo lugar que umha parte importante nom votara ao BNG em 2007, em concreto 39'5%. Na sua grande maioria, 60%, som pessoas que nom votaram em 2007. O grupo mais importante é o que nom tinha idade para votar, mais de 10% dos que pensam votar BNG em 2011 nom tinha 18 anos em 2007. Neste estrato etário o voto decidido ao BNG situa-se em 20%, similar ao do PP e ligeiramente por baixo do correspondente ao PSOE. No eixo esquerda-direita este grupo de novas/os votantes ao BNG situa-se mais à esquerda que o resto de eleitoras/es da sua idade, de facto o BNG concentra o voto das/os que se situam na esquerda (2 a 4 na escala 1-esquerda a 10-direita).
Ao igual que aconteceu noutros processos eleitorais o BNG logra um maior sucesso entre o eleitorado mais novo, 42% das/os que declaram ter a intençom de votar polo BNG nom alcançárom os 31 anos; 24% estám entre 31 e 40; 18% tem mais de 40 e menos de 51 e 16% supera os 50 anos. Porém nom é a opçom preferida polas/os que nom tenhem mais de três décadas.
Outro 13% nom votara em 2007 porque nom pudera ou porque nom quigera. A chegada ao BNG de votantes que em 2007 optara por outro partido é pequena, apenas 10% procedentes do PSOE, PP e EU.
Em definitiva o inquérito mostra-nos a relevância quantitativa dos fluxos de votantes, tanto no sentido de entrada ao BNG como no de saida ao que nom nos referimos. Também nos deixa entrever que umha parte importante do eleitorado do BNG nom está satisfeito com a gestom do governo municipal nos últimos quatro anos, embora a opçom que Conde Roa representa seja muito pior valorada.
