Ciência, clima e meteorologia

Em apenas uns dias vai rematar o verám. No mês de Junho nos jornais informavam que este ano o verám ia ser muito caloroso e com poucas chuvas. Que foi o que ocorreu?, quem errou?. Seriam os meteorólogos?, seriam os jornais?, ou será que nom distinguimos entre meteorologia e clima e queremos encaixar todo num desenho pré-concebido?.

Todo o mundo da por feito quando se fala cultura, ter grandes conhecimentos de literatura, história, filosofia, arte..., Mas ciências?, nom, iso é cousa de frikis. Nom sei de onde vem este conceito, (por certo, recolhido no nosso sistema educativo já que no conhecimento geral nom há assinaturas de ciências) pois na Grécia clássica os grandes pensadores também tinham conhecimentos de matemáticas ou medicina. A conseqüência disto muitos que presumem de ter lido grande Quantidade de livros e de ser uns grandes eruditos, se lhes perguntam pola entropia pensam que um senhor grego.

Qualquer escritor é considerado umha pessoa culta, mas Eduard Punset é considerado um friki. Ou mais perto de nos Iolanda Castanho é umha pessoa culta, mas Jorge Mira é um flipado. Se um conhece o nome de cada um dos jogadores de umha equipa de futebol, é normal porque gosta do futebol, é incluso normal saber várias, e em que partidos marcárom goles.... Mas se um conhece a tábua periódica dos elementos, é um tipo raro, e se ademais conhece os isótopos mais importantes está mal da cabeça. É por iso que os documentais os ponhem á hora da sesta, mas em "prime time" dam futebol ou "coraçom".

Graças a esta (para mim incompreensível) incultura geral geral em ciências é possível que nos ocorram cousas como as deste verám. É totalmente normal escoitar que "o aquecimento global está provocado polo buraco na capa de ozono", ou que "as baratas e os piolhos fam-se resistentes aos insecticidas", nom só é normal, e que se dis o contrário rinse de ti por parvo. Em USA há umha grande quantidade de gente que crê que a terra é plana, e há mais gente que acredita na criaçom que na teoria da evoluçom, mas nom podemos rir muito alto.

Umha das cousas básicas do conhecimento é a interrelaçom, nom há conhecimentos estancos, todo está relacionado. Evidentemente ninguém seria capaz de ter o conhecimento absoluto, podemos conhecer partes mais ou menos amplas, centrar-nos no que mais gostemos ou consideremos mais interessante, mas tendo em conta que nom há conhecimento estéril e que nom ajude a ampliar a nossa cultura.

Volvendo ao verám que remata, o clima nom é algo linhal, ainda que um acredite no aquecimento global, nom quere dizer que a temperatura vai ser sempre mais alta e que sempre vai chover menos. Suponho que essa previsom para este verám seria um suposto, ou igual um de vários, mas ao jornalista de turno pareceu-lhe o mais adequado porque encaixava bem. Provavelmente, se conhecera a diferença entre clima (o tempo (temperatura, ventos, chuvas) em longos períodos, de até a milhons de anos) e meteorologia (o tempo em períodos curtos de dias ou semanas), nom teria cometido esse erro.

Nisto do clima como em todo também há modas, as teorias cientificas também evoluem em funçom dos dados, da informaçom... E mentres nom se demostrem, som susceptíveis de mudar. É muito difícil quando se fala do clima ou meteorologia, onde intervenhem umha combinaçom de múltiplas factores, endógenos e exógenos, muitos deles ainda nom bem conhecidos e desde logo menos ainda as suas interacçons, assegurar cousas com rotundidade. Nos anos 80 estava de moda umha teoria climática que falava dumha próxima glaciaçom, nom tardou muitos anos em virar 180 graos e agora está maioritariamente aceitado o aquecimento global.

Há muita informaçom que permite crer que esse será o caminho que tome o clima, mas nom a temos toda. O que quere dizer que provavelmente será por esse caminho, mais o como é mais difícil estabelece-lo. Desde logo a meteorologia, ainda dentro dumha linha climática clara de aquecimento é muito variável, podemos ter veraos mais quentes e mais frios o mesmo que os invernos. Mas ter um verám como este nom muda a teoria global. O problema está quando pensamos que todo tem que ir na mesma direcçom. Até Lenine dizia o de um passo adiante dous passos atrás, porque ainda que a humanidade tenha um caminho nom sempre todos os pequenos movimentos vam cara adiante.

Mas umha cousa é que disponhamos de dados que nos permitam elaborar umha teoria climática e outra muito distinta é predecir a mais de 50 ou 100 anos os centímetros exactos que vai subir o nível do mar num lugar determinado do planeta, ou a quantidade de chuva que vai cair em algum lugar em concreto. Há cientistas e há teorias, mais também há muito papam que porque um dia leu o "muy interesante" é um experto em teorias climáticas, é como se eu por ler no colegio a celestina me convertera num especialista em literatura do século de ouro espanhol.

Ler, ver, escoitar e pensar, aprender. Só desde o conhecimento e a elaboraçom do pensamento podemos avançar. Sempre há que ter umha dúvida, a que nos obrigue a pensar e a aprender, a que nos permita avançar.