Quem deixou de votar ao BNG o 1º de Março de 2009? (Anticipo)

Antes de entrar em matéria permitam-me umha advertência. A mostra nom foi desenhada polo CIS para analisar a perda de votantes do BNG e muito menos a influência do jornal corunhês nesse resultado. Polo tanto as cifras que extraemos desse inquérito nom som estatisticamente representativas mas cremos que si oferecem alguns dados de interesse.

O CIS realizou 947 entrevistas na província de A Corunha; 45'4 % das pessoas entrevistas declarou que preferia La Voz para informar-se; 54'6% preferiam outros jornais ou nom se informara da campanha através dos jornais. A pergunta que incluia o inquérito era exactamente: e que jornal prefere você para informar-se? Esta questom formulava-se-lhe unicamente aos que anteriormente contestaram que seguiram a informaçom política e eleitoral durante a campanha através de jornais de informaçom geral, ainda que fosse só de quando em vez.

Perguntados polo seu voto em 2005 nas eleiçons galegas 12'3% das/os leitoras/es de La Voz declarou que votara polo BNG naquel ano; percentagem essa calculada sobre o total das/os que declarou preferir esse jornal. Agora bem umha parte importante das/os entrevistadas/os afirmou que nom lembrava a quem votara em 2005 e outra parte que nom tinha a idade legal para votar naquel momento. Se nom os consideramos a percentagem de voto ao BNG entre os que tinham idade legal e lembravam o seu voto, ou preferiam nom contestar, se eleva a 14%.

Entre esses mesmos leitores do jornal corunhês o voto ao BNG nas eleiçons galegas de 2009 alcançava unicamente 9'7%. Em quatro anos o BNG perdeu 30% dos votantes que tivera entre os que declarárom que preferiam La Voz de Galicia. Entre as/os que preferiam outros jornais ou nom se informaram da campanha eleitoral através de jornais a percentagem de voto ao BNG reduzira-se 15'3%, a metade da queda que experimentou entre os leitores de La Voz.

Em número redondos o censo eleitoral era de 950 mil sem contabilizar os denominados residentes ausentes. Se 45'4% preferia La Voz para informar-se estariamos falando de 431 mil pessoas. Considerando que o BNG passou de ter 14% dos votos desse colectivo em 2005 a obter 9'7% em 2009, o BNG perde mais de 18 mil voto entre as/os que preferíam La Voz. Entre os que nom preferiam o jornal corunhês a perda de votos aproximaria-se aos 10 mil. Em total estariamos falando duns 28 mil votos menos segundo este estimaçom dos que praticamente dous terços se concentrariam entre os que preferiam La Voz.

Nom significa isso que a linha editorial desse jornal explique a reduçom do voto, no inquérito nom há perguntas das que se derive directamente umha relaçom causa-efeito desse tipo. Porém é chamativo que a perda de voto do BNG é muito mais forte entre as/os que preferem La Voz para informar-se. Ademais nom devemos esquecer que o impacto dum meio de comunicaçom como este nom só se evidenciam nas suas leitoras e nos seus leitores senom que o alcance das suas notícias alcança um círculo mais amplo de pessoas. Tendo em conta estas cifras é difícil sustentar que a política do jornal corunhês nom tivo um importante impacto no resultado eleitoral.