A batea 2, nunca segundas partes forom boas

Já está case lista, já chega por fim a batea de depuraçom. Os mariscadores vam-se fazer ricos. Para que se vam fazer as EDAR, já nom é necessário, porque com a batea vam produzir mais que antes de te-la.

Se um segue a informaçom da batea no jornal "La Voz de Galicia", semelha que estám a piques de rematar os problemas das zonas C. A batea já está aqui. É como nas películas do "oeste" quando chegava um homem numha carreta a vender um elixir que o curava todo, aqui o elixir o fabrica a Conselharia do Mar e o vende "La Voz".

Depois do assalto do verám, de um dia para outro aparece a batea, que logo nom foi tal. Mudárom a estrategia, primeiro preparam o terreno com propaganda, e muita, para chegar depois com a salvaçom. Mas e todo propaganda?, realmente é umha saída eficaz para os mariscadores e mariscadoras.

Recalificaçom da zona mais externa da ria de Ferrol. A Conselharia tem dividida toda a costa galega em zonas Gal, com um critério algo estranho, algumha das zonas correspondem-se a divisons naturais e outras som incompreensíveis. Em qualquer caso , aqui subdividirom umha dessas zonas, o Gal 03-03, para muda-lo á categoria A. É seguro que essa zona é A, mas também poderia-se aplicar este mesmo critério para fazer subdivisons noutras zonas. Volvendo á nova zona A e única da ria de Ferrol, á carom do porto "exterior" da ria, onde se fam descargas de carvom, sem coberta, e de todo tipo de materiais, todo descoberto, incluídos os áridos asfálticos tam famosos ultimamente e dos cales há bastantes toneladas depositadas no porto. Planta de biodiesel que já tivo mais de unha fuga... Micro-biologicamente é zona A, mas, a alguém da Conselharia ocorreuse-lhe analisar a presença doutros contaminantes, especialmente os inorgânicos. Umha prova evidente de que as cousas nom vam bem e a alteraçom da flora e fauna dos fundos de toda essa zona e a perda de algumhas espécies, também a degradaçom da praia de Carinho evidencia que a situaçom nom é boa. Para rematar, que umha zona nom tenha contaminaçom microbiológica nom quere dizer que seja saudável. Um lugar contaminado por cloro ou cianuro ou por outras muitas substâncias, nom teria contaminaçom microbiológica, mas tampouco vida doutro tipo.

Na "Voz" também informava-se da quantidade de marisco que vai passar pola batea ao longo do ano 2012, afirmando-se que na ria de Ferrol vai-se extrair tanta ameixa como há 10 anos, e dam dados exactos. De novo desde a Conselharia jogam com nos. Utilizam os dados obtidos numha mostragem com um método elaborado para mostragens a pé, mas que extrapolado á frote provoca grandes erros. Mas ainda no caso de que os dados foram reais, eles refirem-se ao total da biomassa estimada (toneladas de ameijas), há que ter em conta que nem todas as ameijas sobrevivem (há umha importante mortalidade), nem os mariscadores som capazes de colhe-las absolutamente todas. O que si há real de todo isto é que a situaçom do banco das Pias melhorou algo, mas nom foi pola depuraçom que nom existe, ou por causas estranhas. Isto foi real e possível graças aos trabalhos de regeneraçom do banco levados a cabo polos mariscadores e mariscadoras das confrarias de Ferrol e Baralhobre, de outra maneira estaria-mos a falar dum banco morto.

Melhora dos ingressos, quando desde a Conselharia informasse-lhes que um 10% da sua captura nom se lhe paga porque a tenhem que assumir os mariscadores como perdas, onde está a vantagem?. Ademais, do 90% que queda há que imaginar que os compradores paguem este marisco ao mesmo preço que o procedente de zona B.

O processo de depuraçom vai ser tam rápido como eles dim, porque cada dia que passe o marisco na batea a mortalidade aumenta. Eu creio que ao final vai passar como com o elixir sana-todo, nom curava as enfermidades, emborrachava e depois um seguia igual de enfermo.

Merecemos respeito e seriedade, soluçons reais e nom trapalhadas e atalhos a nengum lugar. Há que construir as EDAR já e começar a regeneraçom dos bancos danados por anos de ineptitude.