16:22 Venres, 03 de Xullo de 2020
Terra e Tempo. Dixital Galego de pensamento nacionalista.

02-06-2010

A crise é a excusa para incrementar a productividade e empeorar as condicións de traballo

A río revolto, ganancia de pescadores

Valorar (5)

XOSÉ RAMÓN GONZÁLEZ LOSADA


Fábrica de COASA


COASA (Compoñentes Aeronáuticos COASA Sociedade Anónima Unipersoal) empresa que forma parte do Grupo AERNOVA AEROSPACE,  con arredor de 40 centros de traballo, distribuídos polo estado, e  varios países do mundo,  iniciou  a súa actividade en Ourense no  Parque Tecnolóxico de Galicia no ano 2001, e   actualmente conta con 261 traballadores no seu cadro de persoal.

Obtendo  importantes beneficios desde o inicio da súa actividade en Ourense, coa escusa da crise económica ameaza con un expediente de extinción de contratos que afectaría a 37 traballadores e traballadoras.

Tal ameaza de expediente de extinción de contratos, sitúase no tempo a raíz do intento do Comité de Empresa de actualizar un Acordo de Empresa que melloraba  varios pluses recollidos no Convenio Xeral de Industria Química, e cando o Convenio estatal de aplicación acaba de prorrogarse integramente no Seu contido, sen incremento salarial algún  para o ano 2010, coa convivencia dos sindicatos estatais CCOO e UGT.

Partindo da conxelación salarial contemplada no antedito convenio colectivo, a empresa aproveita as reunións de negociación do Acordo, para tentar impoñer  unha flexibilidade horaria  e de quendas  a carta, engadindo  unha redución dos tempos Standard  para aumentar a produtividade, e ameazando que si elo non se acepta, pasaría  xa directamente a un Expediente de Extinción de contratos.

Ante esta situación de conxelación salarial e de empeoramento  das condicións de traballo, foi celebrada unha asemblea convocada polo Comité de Empresa o día 24 de abril de 2010, no salón de actos do ATENEO DE OURENSE con grande participación do cadro de persoal, na que foi sometida a referendo a proposta da empresa, sendo rexeitada esta  por  unha ampla maioría de traballadores e traballadoras a pesar das devanditas  ameazas de despedimentos por parte da empresa.

En resposta á firmeza dos traballadores, con data 3 de maio a empresa, presenta o Expediente de Extinción de Contratos, con que tiña ameazado ante a Delegación Provincial da Consellería de Traballo de Ourense.

Nas preceptivas reunións do Expediente entre a Empresa e os representantes legais dos traballadores, empeza a aflorar unha nova ameza consistente en desviar a produción a outros centros de traballo do Grupo, como xustificación para os 37 despedimentos  se non se aceptan a flexibilidade e o aumento de produtividade.

Dende a CIG, como sindicato con presenza no Comité de Empresa, manifestamos a nosa oposición ao expediente, e recollendo o sentir maioritario da asemblea non estamos de acordo en que baixo o pretexto da crise, se aumente a flexibiliadade,  se empeoren a condicións de traballo e se aumente a produtividade a costa dos traballadores e traballadoras, baixo ameazas que non teñen xustificación.


Engade o teu comentario:

Os campos marcados con* son obrigatorios.







© Fundación Bautista Álvarez de Estudos Nacionalistas
Terra e Tempo (ISSN 1575-5517)
Avenida de Lugo, 219, 1º, 15703 • Santiago de Compostela • Galiza
981 57 02 65 – info#code#terraetempo#code#gal

A Fundación recibiu unha axuda da Deputación da Coruña na convocatoria de 2018 para a mellora da utilidade de páxina web. Deputación da Coruña