01:35 Venres, 18 de Outubro de 2019
Terra e Tempo. Dixital Galego de pensamento nacionalista.

12-06-2011

Arde Lvcvs, é por se só un espectáculo de cor e de sabor a pasado, pero tamén o é de recordatorio da súa orixe

Arde Lvcvs, unha festa do pasado romano de Lugo

Valorar (7)

ADOLFO DE ABEL VILELA


 COHORS III LUCENSIUM


Desde fai varios anos na segunda quincena de xuño, celébrase en Lugo, durante tres días, a festa chamada "Arde Lvcvs" que trata de rememorar a orixe romana da cidade e que este ano terá lugar os días 17, 18 e 19.

Non é unha festa máis das moitas que se celebran en Galicia durante o verán, senón que pola súa singularidade pódese dicir que ten a súa propia identidade. O maior éxito é a participación de centos de lucenses e forasteiros ataviados con roupas de época, moitas delas preparadas en talleres instalados en centros sociais dependentes do Concello, nos que se facilitan modelos e ata teas para poder confeccionalos. Outros foron producidos en centros penais da provincia para a súa posterior venda, unha forma positiva de colaboración cos internos destas institucións. Desde fai días o comercio local tamén ten nos seus escaparates traxes, masculinos e femininos, adornos, calzado apropiado e outros elementos necesarios para unha boa caracterización.

Revivir o pasado romano

Os festexos comezan cun pregón que está a cargo do personaxe que fai de emperador, rodeado por senadores, patricios, representantes de diversas tribos e mulleres da alta aristocracia. Tampouco faltan os escravos e os libertos. Hai de todo, como no Macelo ou mercado, instalado na Praza Maior, onde, ademais das tendas e lugares para comer, está o campamento da Cohors III Lucensium, unha asociación cultural que recrea as diversas misións dos lexionarios romanos, loita de gladiadores, xogos, instrución e desfile militar, perfectamente instruídos e ataviados.

Aínda que non se sabe que Lvcvs Avgvsti tivese circo e teatro, con todo tamén se fan representacións de carreiras de bigas, loita de gladiadores e outros espectáculos para diversión dos lucenses de hoxe, en presenza do César, que os indulta ou os castiga a morrer, ante a atónita mirada dos nenos que pensan que é real o sangue que sae dos que caen feridos ou axustizados.

Tamén se pode visitar un campamento, que recorda que a orixe da cidade de Lugo foi un campamento militar establecido no ano 25 a. de C. con motivo da última fase das chamadas Guerras Cántabras, e que posteriormente, entre os anos 15-13 a. de C. daría lugar ao nacemento da cidade.

Máis aló da ficción

Arde Lvcvs, é por se só un espectáculo de cor e de sabor a pasado, pero tamén o é de recordatorio da súa orixe, para o que en días previos celébranse conferencias dedicadas a diversas cuestións históricas do Lugo romano, como a muralla, o rito funerario, etc.

A festa, na que a diversión está garantida, aseméllase a un gran estudio de Cinecitta e aos extras daquelas películas de romanos, como "Os dez mandamentos", "Benhur", producidas nestes estudos de Roma ou ás dos anos 60 producidas por Samuel Bronston en España, autor de "Rei de Reis" ou "A Caída do Imperio Romano". .En Lugo a muralla é auténtica e os extras tamén. Nada é ficción senón realidade.

Cada ano son máis os participantes, autóctonos e foráneos, de maneira que o Arde Lvcvs converteuse na segunda festa máis importante da cidade despois do San Froilán, sendo o seu desenvolvemento unha excelente propaganda turística nunha cidade cun gran potencial pero que non está suficientemente desenvolvido, e nun motor económico de certo sector do comercio e da hostalería lucense, cuxos ingresos agradecen en tempos de crise como os presentes. Anímense e veñan connosco a formar parte deste gran espectáculo.


Engade o teu comentario:

Os campos marcados con* son obrigatorios.









Aniversario Moncho Reboiras 2017


© Fundación Bautista Álvarez de Estudos Nacionalistas
Terra e Tempo (ISSN 1575-5517)
Avenida de Lugo, 219, 1º, 15703 • Santiago de Compostela • Galiza
981 57 02 65 – info#code#terraetempo#code#gal

A Fundación recibiu unha axuda da Deputación da Coruña na convocatoria de 2018 para a mellora da utilidade de páxina web. Deputación da Coruña